更正。我姑婆原來已經超過九十歲。我爺爺同尋晚係姑婆屋企打牌同食飯。佢地話姑婆後尾問佢地，頭先有鬍鬚o個個男人係邊個... 哈哈哈，姑婆竟然記得見過我，都話留鬚好o架啦，連老人癡呆都記得。連我姑媽（一個五十幾歲既師拉）都話我型... 哈哈。
尋日姑婆重有單攪笑o野。佢食我爺爺帶返黎o既巨型番荔枝o個時，話要煮返熱食，凍o左唔好食... 哈哈哈。
其實姑婆除左老人癡呆之外身體一切都好好，我地先至笑得落。咁都唔錯，老o左有錢有老公同一班子孫陪同照顧，自己就乜o野煩惱都冇，淨係記得以前D開心o野，身體又健康。睇我條生命線，我都可能九十歲都未死得，唔知我有冇咁好福氣。
尋晚成五點先返到屋企，今朝十點就要起身陪爺爺去太和飲茶。佢地次次返黎都會去同我姑婆，即係我爺爺既大家姐飲茶。我姑婆九十幾歲，十年前開始有老人癡呆症，淨就記得幾十年前D野，連自己D仔都唔認得，朝早會問人坐o係間房裡面個男人係邊個（個男人係佢老公.. 哈哈）。
姑婆當然唔認得我，但係人地o係佢面前提起我，佢就話記得我細個o個陣成日帶我去行街，有次我要企係間玩具店前睇玩具，姑婆拉住我要我走，話我成屋都係玩具，唔準再買。我就答佢：「我睇下架咋，我睇陣就走架o刺。」唉，我到依家都係睇多過買... 1.5米高既RX-78同紅彗星呀... Millennium Falcon同X-wing fighter呀... 成十年冇砌高達o刺... 唔知依家仲有冇得賣Perfect Grade既RX-78呢 ?
臨走o個時，姑媽再話比姑婆知我係康仔。姑婆問我讀完書未，哈哈... 讀完好耐o剌。佢話：「我湊過既細路哥個個都要讀書既，唔讀書冇用o架。」又真係，比佢提一提先記得，細個時佢真係成日叫我要讀書，唔讀書冇用。唔通我細細個就比姑婆催眠o左 ?
