清明節

今朝去拜山，諗住在坐西鐵去到荃灣站，然後行過去。姑媽打o黎，叫我o地由荃灣站坐的士過去。又係喎，grandma雖然仲行得，但係都唔好行得太多。但爸爸話的士只可以係外面落客，唔可以入到裡面。我話，同的警察講有兩個老人家，應該可以放行。就係咁，我同細佬就同爺爺grandma一齊坐的士入到去，其他人就行左20分鐘... 哈哈，唔洗行。

搭的士經過以前住果度，依家已經面目全非，起好哂超高新樓，應該就快賣得。我o係果度大，住o左二十幾年，依家發夢返屋企都係返果度，而唔係其他住過既地方。我仲記得我地未搬入去之前，媽媽拖住我（我果時得4歲）係層樓樓下望，佢話：「我地遲d就要搬去果度喇。」

姑媽姑丈年年都會同我地一齊拜太婆。拜完之後我地九個人一齊返入屯門飲茶，之後黎我地屋企打牌。去到茶樓，超多人，至少要等45分鐘。於是我地上左樓上間茶餐廳，原來佢都有好多小茶，而且已經有幾圍檯坐o左出黎，都係拜完山既人。結果我地就係果度叫小菜，竟然仲好食過間茶樓同對面間大排檔，真係失覺哂。

上次同爺爺飲茶佢爭住要比錢，君子有所不為，爭比錢係其中之一，所以我都唔同佢爭。不過今次除左爺爺之外，仲有爸爸同姑媽會爭，所以我比定五百蚊細佬，叫佢比錢。佢最細，又唔係經常比，佢地一定唔會同佢爭。哈哈... 死仔，比錢果陣，爸爸起身話佢比，細佬企起身指住佢話：「錯，呢次我請。」咁就立埋張單去比錢。

近排有d撞聾，頭先搭西鐵，細佬話唔知話乜野閉門作賽，我就聽到「閉門種菜」... 哈哈。