Terminal 2

今日爺爺要返台灣了，我同細佬坐爸爸車送佢地去機場。以前好少叫我多d打電話過去，近幾年佢經常都叫我咁做。我會架喇。

送左佢地入閘，我同細佬去左新開既Terminal 2八下。去到行左一輪先知，果度連登機閘都冇，只有Check-in櫃位同機場有關。Terminal 2地下一層係返大陸既巴士站，樓上係一個兩層既商場加check-in counters。佢d食肆加商店既數目仲多過check-in counters，而且幾靚。我相信呢個Terminal 2主要係因為Terminal 1冇位起商場而建。

呢個Terminal 2商場其實幾正，d鋪幾得，仲有間大機鋪，有架360度旋轉既頭文字D賽車機，有幾十人排隊等住玩。



果度仲有一部乒乓波機，不斷噴d波出黎，你要將d波打去指定既地點。個場仲有十幾架貼紙相機，不過仲未用得。



商場上層有好多食肆，都係幾出名既食店。行到有d餓，赫然發現有間黃枝記，即刻拉埋細佬入去。前年o係澳門食過佢既蝦子撈麵，超正，即叫。細佬就食豬扒包。



黃枝記隔離有間扭蛋鋪，好多扭蛋機。一問之下，竟然有三百幾部機，去乜鬼扭蛋節。有d蛋幾得意，我幾十歲人都扭左三隻。

個場仲有一間4D電影院同一間蚊型航空館，有幾架飛機模型，同一個飛機引擎模型。最正係佢有一個駕駛倉，可以坐入去，個窗一路播住一段simulation，由畢架山經過九龍城，降落啟德機場。佢雖然尚未開放，不過細佬都坐左入去玩... 哈哈（有相為證）。

我地o係個場無無聊聊都玩左兩個幾鐘。坐車走時細佬問我有冇搭過昂平吊車，我話冇，佢話不如搵日搭下。我話：「好，不過有冇女一齊去先？」