南生圍

今日原本諗住一個人去南生圍行下，同阿爸阿媽講起，佢地又要跟住黎。都好，好耐冇同佢地去玩。

南生圍大部份魚塘已經荒廢晒，行到南生圍外圍一個魚塘先遇到個阿叔，佢話自已係呢度長大，依家半退休，返黎魚塘起番間屋，養魚種菜，出面市區d生活過唔慣。佢養左隻黃狗仔，好痴人，我一行近個魚塘佢就走黎Lam我。

再行到差不多到紅毛橋，經過一個農場。我地去到諗住食豆腐花，入到去先知裡面好大，有幾個魚塘，有d養左烏頭、近木棚既魚塘種左好多睡蓮同蓮花。我地行浮排落去個睡蓮池度映相。有好多拍友入黎映佢地d睡蓮，仲送番d相比佢地，掛出黎威下。

今日係閒日，冇其他客，事頭婆帶我地參觀。佢話個農場開左四年，種左好多果樹，有兩棵大樹菠蘿長滿好大隻既大樹菠蘿，仲有幾棵蘋果芒，長滿紅芒果。我問事頭婆d大樹菠蘿幾時食得，佢話d大樹菠蘿已經比人訂左。

佢個棚內有個錦鯉池，池邊有棵蘋果芒，加上好多錦鯉游黎遊去，好靚。我同事頭婆講，個錦鯉池將成個場個格提升左。佢話，其實成個農場係由佢地兩公婆一手一腳砌出黎，一間屋自已住，一個木棚比人坐低食野同休息、魚池、魚塘、荷花池，全部都係佢地自已用人地唔要既廢料砌出黎。

佢地仲養左蜜蜂，自已整蜜糖同蜜糖酒。個場有得燒烤，但聽事頭婆既口氣，佢唔係咁鍾意呢類客，可能攪到個場又嘈又污糟呱。

最後事頭婆帶我地去田度自已摘甘筍，洗一洗就食得，好好味。佢話後面菜田仲有好多菜，不過多數都係各種鬼佬生菜，阿媽佢地唔食Salad，所以冇去到。

我地剛去到時，事頭婆正打磨緊佢老公刻既木牌片，用黎掛係個木棚內。其中一塊牌片寫住：

舒舒服服過辛苦日子

從佢地養魚、種菜、種果樹，連唔係咁鍾意既燒烤都做埋，可以想象佢地初初開始做時有幾傍惶。以佢地依家咁既規模，再慢慢整靚佢，應該有得做既。

個農場叫敬輝農場，事頭兩公婆姓郭，weekend會接本地旅行團客。等蘋果芒熟左再去食，仲有佢d豆腐花，好滑。

Click呢張相可以睇到我今日映既相。



行完叫埋細佬入元朗一齊食飯。我話去大榮華，但阿媽話想食第二d。於是去左田中食壽司。佢d野幾抵食，不過貨色可能次一等。$68一板海膽，不過唔夠味。咖哩豬扒炸得好脆，不過咖哩唔夠甜。牡丹蝦一客得三隻，我讓晒比佢地食，試唔到。