單車自由行

今日訓到一點，爽。食埋阿媽整既冷麵，踩細佬架單車入天水圍。

今日我完全冇計劃，淨係諗住踩單車入天水圍玩下。帶支水，一件衫換，咁就出發。路上問一個大叔點入天水圍，佢好好心帶我去行一條冇咁多車既路。入到天水圍再沿住河邊一直踩到濕地公園，都唔使一個鐘。我唔知條河叫乜名，不過條河兩岸都整到成個公園咁，好踩過沙田。去到濕地公園已經四點半，佢地四點就停止賣飛。下次要早d黎。

o係濕地公園機買水，個Secure阿姨走黎聊我講野，仲教我點踩番出去。不過我話我只係得閒得滯四圍去，諗住踩入嘉湖同d屋村先走。結果比我係天盛苑間實惠見到我一直都搵唔到既沙灘椅，要黎放係花園睇書+晒太陽。屯門果間都冇得賣。但我踩單車唔到，細佬又已經上左車返屋企，下次搭西鐵一個站入黎買。

返黎時搵唔返條路，結果踩左入屏山。不過都係一樣，直出就係青山公路。我想踩入流浮山食炸金蠔，但搵唔到路。搵次約班人踩單車入流浮山食炸金蠔都幾型。

咁樣漫無目的咁四圍行都幾過癮，遇到乜就做乜，諗到乜就去做。最好就係唔會盪失路，因為我根本冇目的地，諗到去邊就去邊。好在屯門同天水圍都有單車徑，可以自由行。
________________________

踩返黎途中突然諗記，細個時阿時時帶我去荃灣大會堂塊空地踩單車。果時我得7、8歲，o岩o岩學識踩單車。阿會食完晚飯先同我去，話唔會晒（可能驚我會中暑）。果時仲要抽架單車上天橋。我諗都係想我多d運動，健康d。我記得果時佢仲買左個籃球比我，帶我去福來村打，但我果時實在太矮喇，個波又重，打兩次就唔想再打，仲攪到我以後都唔鍾意打籃球添（其實係我唔鍾意籃球太多衝撞）。不過，我總算搵到d我鍾意玩既運動，壁球、踩單車、行山、獨木舟、踢波、滑雪。總算有d交待。