元朗大榮華與元朗何師拉

今晚約左去何師拉屋企，原本由佢下廚整幾味我地嘆，我提議不如食大榮華，Judy即刻拍手贊成。於是我地五人就去左元朗大榮華食飯。終於食到佢既豬油撈飯。飯用砵仔蒸，熱辣辣淋上豬油同頭抽，一撈，真係好很好食。佢既麵醬炒油麥菜超好味，麵醬甜甜地，加埋唔同甜法既油麥菜，電！我地仲叫左五味雞，雞好滑，又入味。雞蛋蒸魚腸，冇想象中咁好味。煎釀鯪魚連我唔鍾意食鯪魚球既人都食左兩大件。五個人叫左五個菜，多得我同何生，全部清晒，仲要食左兩砵豬油撈飯（實在太好食），再叫左一籠馬拉糕，飲埋送既紅豆沙同麥米粥。當然，半籠馬拉糕打包。埋單只係三百幾，何師拉話佢請。哈哈，多謝。

食完去左佢地屋企，就o係我前兩日行南生圍既起點附近。佢地隻mini cocker實在太可愛喇，比佢地train到坐低就自動遞手，企起身同訓享地都識旋轉，玩追骨頭玩唔厭，我一抱佢就lam我。

何師拉整左兩個蛋糕招呼我地。一個Blueburry cheese cake，另一個佢聲稱整衰左，其實只係差個頂既青蘋果Jelly未整好既青蘋果蛋糕。佢開頭唔肯個青蘋果蛋糕出黎，我食完個Blueburry cheese cake之後話幫佢食個青蘋果蛋糕，佢先出黎。一試，好清甜，仲好食過個Blueburry cheese cake（雖然個cheese cake已經好食過出邊買既好多）。我一食食左兩件。

好飽。返到屋企，阿媽仲摘左蘆薈整左糖水。飲左少少，聽日要踩番三個鐘單車先掂。

我問何師拉，佢有乜撚手小菜，佢竟然話梅菜扣肉！不得了，下次一定要整黎嘆下。

p.s. 頭先食得太興奮，唔記得影相。各位可以去呢個Blog睇下人地影既相。