燒玻璃

今日係玻璃燒製綜藝Glass Art Introduction 的第一課，但要先落去打埋場比賽，之後急急腳趕出去官塘個Workshop上堂，竟然仲有時間食個咖哩牛腩飯。

去到先知個course只有6個學生，我係唯一一個男生。原來個course差d開唔成，多得我同阿Sue報名先夠人開班。老師係一個Glass Artist，過去幾年都有展出過佢既作品。佢個Workshop幾Professional，有齊所有燒製同打磨器材，仲係香港唯一一個私人Workshop有吹玻璃既設備，只有浸大先有另一套，仲要係我地既老師負責設計。

今日第一堂只係簡單咁介紹各種工藝既方法，hot work、warm work 同 cool work，同埋相應既器材。老師示範左吹玻璃，同帶我地其中幾個人試做d簡單既野，例如用微波爐既Kiln去燒熔d玻璃粒，變成一塊有幾種色既吊錘、用噴沙機將玻璃杯磨沙，同做玻璃紙鎮。而我就做左個由幾粒有圖案既意大利玻璃粒同一小塊無顏色既玻璃鎔合而成既吊錘，下星期要帶返去打磨。


我的第一件作品